Đơ̆ng rŏng kơ mơ̆ng nơ̆r tơgop, sơkơ̆t hop akŏm, Thủ tướng Phạm Minh Chính hlôi tơbang hơdah tơdrong jang đei jơnei, dôm tơdrong oei tơjruh lơ̆m noh tơbang hơdah  “5 tơdrong tam mă jang đei” nhen: Pơđep pơgơ̆r jang mŭk drăm tơm, mă hăt noh huach kư̆ kă, jên cheh, kơjă oei kơjung kơyuơ kơjă dâu kơtoăl, kơjă tơmam xa, jên cheh, kơjă tĕch răt lơ̆m kơpal teh tŏk jur ưh đei sơđơ̆ng; tơdrong răm gah jang jên hu, tĕch răt teh – hnam oei lơ̆m kơpal teh; tơdrong ưh đei sơđơ̆ng gah chĭnh trĭ, mŭk drăm tơpôl đei ƀôh tŏk lơ.

Lơ̆m khei năr truh, Thủ tướng pơkăl, tơguăt hăm Tơchơ̆t Hop akŏm XIII kơ Đảng, tơdrong pơgơ̆r đơ̆ng Trung ương, Anih tơm Chĭnh trĭ păng jơnŭm pơgơ̆r dơnơm, Trong jang hơtŏk mŭk drăm tơpôl sơnăm 2021- 2030, dôm tơdrong jang 5 sơnăm đơ̆ng 2021- 2025, dôm Tơchơ̆t đơ̆ng Jơnŭm pơgơ̆r teh đak, Thủ tướng teh đak. Ưh đei kơdŭn hăm tơdrong tơnap tap, vei sơđơ̆ng đon tơchĕng pơm kiơ̆ tơchơ̆t tơlĕch hăm tơdrong hơdrin kơ-‘nôh hloh dơ̆ng, pơm jang đei jơnei hloh. Iŏk jơhngơ̆m pran kơdih vă pơm jang đunh đai, iŏk tơdrong tơgŭm đơ̆ng ‘nguaih vă hơtŏk. Iŏk yua tơdrong tơguăt tơguăl, lăng tơnap tap jing trong vă hơtŏk tơ-iung. Akŏm pơklaih tơnap tap, hơtŏk jang tĕch pơdro, asong tơdrong jang xa ăn kon pơlei.