Kơsơ̆ 24/8, Thủ tướng Phạm Minh Chính pơgơ̆r ‘Măng hop akŏm Khŭl kơdră teh đak tơdrong jang pơjing khôi luơ̆t khei 8/2023 vă pơma dơnuh dôm luơ̆t: Luơ̆t Anih tơm (hơmet ming); Luơ̆t vei lăng sơđơ̆ng trong nơnăm; Luơ̆t Trong nơnăm; Luơ̆t kơmăy kơ mŏk khŭl linh, vei sơđơ̆ng păng pơlung jang kơmăy kơmŏk. Tơ̆ ‘Măng hop akŏm, Khŭl kơdră teh đak hlôi mơ̆ng anih jang pơgơ̆r tơroi dôm luơ̆t; tơ roi tơƀlang, chih iŏk nơ̆r tơgop pơjing dôm luơ̆t; akŏm nơ̆r tơgop đơ̆ng dôm anih tơm, anih jang; set hơlen găh trong jang, hla ar hơmet ăn; dôm tơdrong athei, tơdrong kăl pơjing Luơ̆t; tơdrong hrơ̆ch 1 ‘măng, drơ̆ng 1 nơ̆r hăm dôm tơdrong hơgăt khôi luơ̆t đei ƀơm truh; hơlen lăng tơdrong hlôh vao apŭng plĕnh teh; hơdai hăm tơblang hơdăh dôm tơdrong kăl păng oei tơgop nơ̆r pha ra băl tơ̆ dôm luơ̆t.

Hơdai hăm ‘noh ăn tơgop nơ̆r hăm rim luơ̆t, pơtôch ‘măng hop akŏm, Thủ tướng Phạm Minh Chính athei dôm Anih tơm, anih jang, ‘moi kiơ̆ tơdrong dăr hơlen, pơtôch, tơdrong pơtruh dôm tơdrong jang, athei pơjing luơ̆t athei pơm rơđăh dôm tơdrong hơgăt iŏk jang, vei nhen tơlĕch ăn dang ei; pơm rơđăh dôm tơdrong hơgăt kăl kơ hŭt lê̆; pơm rơđăh dôm tơdrong hơgăt kăl hơmet ming, tơmơ̆t dơ̆ng, tơlĕch ăn ‘nao. Thủ tướng tơtă, tơ̆ hơnăp kơnh, tơdrong jang pơjing khôi luơ̆t gô trăp hloh. Khŭl kơdră teh đak, dôm bơngai jang lơ̆m Khŭl kơdră teh đak athei hơdrin bơ̆jang kiơ̆ jơnei ‘lơ̆ng găh pơjing, chih pơkeh khôi luơ̆t, hơmet pơ ‘lơ̆ng tôch ai dôm tơdrong tơhlăk tơhlĭn, tơdrong pơgăn, pơm tơdrong hiôk hloh ăn kon pơlei, anih mơdro sa; pơm hơ rơi rim kon jên jang ăn hơtŏk tơiung mŭk drăm - tơpôl hrĕnh păng kơjăp, tơgop jang kiơ̆ jơnei hơnăp jang yua đơ̆ng Đảng, Teh đak hlôi tơlĕch ăn.