Pơma pơgơ̆r pơih blŭng ‘măng hop akŏm mă 2, Thủ tướng Phạm Minh Chính athei Anih tơm Tư pháp roi tơbăt găh tơdrong jang păng pơtôch jang kiơ̆ tơchơ̆t đơ̆ng Khŭl kơdră chĕp kơ̆l teh đak tơ̆ ‘Măng hop akŏm mă mônh. Lơ̆m noh, hơlen lăng tơdrong dôm anih tơm, anih jang bơ̆jang kiơ̆ hơnăp jang hơmet ‘lơ̆ng pơtôch dăr hơlen hla ar hlôi đei Khŭl kơdră teh đak tơƀôh ăn tơ̆ dôm Hla ar roi tơbăt dăr hơlen hla ar pơkăp khôi luơ̆t pơyua ăn Tơdrong tơchơ̆t 101/2023/QH15 păng Tơdrong tơchơ̆t 110/2023/QH15 đơ̆ng Quốc hội jăl XV.

Kŭm hăm ‘noh, roi tơbăt pơtôch dăr hơlen, akŏm dôm tơdrong mơmat tat, tơhlăk tơhlĭn lơ̆m khôi luơ̆t đei ƀôh kăl, kiơ̆ lơ̆m luơ̆t kăl kơ akŏm tơchĕng hơlen, hơmet pơ ‘lơ̆ng păng tơchĕng hơdrol tơlĕch trong jang klăih song ăn dôm anih tơm, anih jang tơchĕng hơlen, hơmet pơ ‘lơ̆ng. Đơ̆ng noh, tơlĕch trong jang đei yua, tôm tơdrong bơ̆jang kiơ̆ hơnăp jang đei Khŭl kơdră teh đak pơjao tơ̆ Tơdrong tơchơ̆t 82/NQ-CP, Tơdrong tơchơ̆t 93/NQ-CP păng Tơdrong tơchơ̆t 81 ‘năr 25/7/2024 tơlĕch ăn Tơdrong bơ̆jang đơ̆ng Anih pơgơ̆r jang.