Đơ̆ng rŏng mơ̆ng dôm nơ̆r tơgop pơma dơnuh đơ̆ng kơdră chĕp kơ̆l dôm anih tơm anih jang tơring, Thủ tướng Phạm Minh Chính chih iŏk, pôk pơ ư, lăng ‘lơ̆ng dôm tơdrong hơdrin păng jơnei iŏk đei đơ̆ng dôm anih tơm, anih jang, tơring; tơdrong pơgơ̆r kơtang đơ̆ng bơngai jang lơ̆m Anih pơgơ̆r jang hơmet ming hành chính khei ‘năr âu ki; đei lơ tơgop ‘lơ̆ng, gĭt kăl lơ̆m jơnei atŭm kơ teh đak.

Thủ tướng athei, dôm anih tơm, anih jang, tơring hơnơ̆ng dăr hơlen, tơplih ‘nao trong jang păng hơtŏk hơnăp jang đơ̆ng bơngai chĕp kơ̆l vă pơgơ̆r bơ̆jang kiơ̆ đei jơnei hơnăp jang hơmet ming hành chính đei pơjao. Kơdră chĕp kơ̆l anih tơm, anih jang, tơring hơtŏk loi dơ̆ng pơma dơnuh vă kơtă băt hơdăh yan âu păng pơgơ̆r hơmet pơ ‘lơ̆ng mơmat tat, tơhlăk tơhlĭn ăn kon pơlei, anih mơdro sa; tơtĕnh jang đang, pơtruh ăn anih gơh kĭ tơlĕch ăn hla ar hơgăt hơdăh khôi luơ̆t, tơdrong tơchơ̆t hlôi đei tơmơ̆t yua khôi luơ̆t.