Tơ̆ ‘măng hop akŏm dôm bơngai jang lơ̆m Khŭl kơdră teh đak pơma dơnuh, set hơlen, ăn tơgop nơ̆r hăm 9 tơdrong ‘noh đei 7 tơdrong athei pơjing luơ̆t, khôi luơ̆t tơm teh đak păng 02 luơ̆t. Pơtôch tơ̆ ‘măng hop akŏm, Thủ tướng Phạm Minh Chính pơma hơdăh, 9 tơdrong tơlĕch ăn pơma dơnuh tơ̆ ‘măng hop akŏm âu ‘noh jĭ hơyak hơmet ăn gĭt kăl ăn tơdrong jang pơjing luơ̆t, khôi luơ̆t tơm teh đak sơnăm 2024 păng tơ̆ hơnăp kơnh. 

Thủ tướng chih iŏk, lăng ‘lơ̆ng dôm Anih tơm: Kŏng an, Khŭl lĭnh, Tư pháp, Ming man, Anih tơm vei lăng tơmam drăm păng cham char, Anih mong jên teh đak Việt Nam hlôi hơdrin hơmet ăn, pơtruh dôm hla ar athei pơjing luơ̆t, khôi luơ̆t tơm teh đak, dôm Luơ̆t; tơpăt chih iŏk, tơroi tơblang hơdăh, đei tơdrong ‘lơ̆ng. Thủ tướng lăng ‘lơ̆ng nơ̆r tơgop đĭ jơhngơ̆m, tơnăp, ƀlep hăm yan âu hăm jơhngơ̆m đon pơjing đơ̆ng dôm bơngai jang lơ̆m Khŭl kơdră teh đak păng athei dôm Kơdră tơm pơgơ̆r chih răk tơpăt, tôm nơ̆r tơgop đơ̆ng bơngai jang lơ̆m Khŭl kơdră teh đak, chih pơkeh dôm nơ̆r athei pơjing luơ̆t kiơ̆ tơdrong hơgăt.