Tơ̆ pơma đam, 2 Thủ tướng hlôi pơma dơnuh tôm tơdrong găh tơdrong hơtŏk tơiung mŭk drăm - tơpôl 2 teh đak, dôm trong jang pơtrŭt tơdrong pơvei 2 pang păng dôm tơdrong apŭng plĕnh teh, tơring vang bơngơ̆t truh. Thủ tướng Hà Lan tơƀôh đon hơiă tơ̆ hơnăp dôm jơnei ‘lơ̆ng đơ̆ng Việt Nam lơ̆m tơdrong tơiung ming păng hơtŏk tơiung mŭk drăm tơpôl đơ̆ng rŏng jĭ Covid-19 păng jô̆ đơ̆ng ‘măng năm ngôi sơnăm 2019 đơ̆ng ƀok. 2 Kơdră chĕp kơ̆l lăng ‘lơ̆ng tơdrong hơdrin đơ̆ng 2 păh lơ̆m tơdrong jang kiơ̆ ‘lơ̆ng dôm tơdrong pơkăp păng drơ̆ng nơ̆r jang hơdai hlôi đei kĭ pơkăp.

2 Thủ tướng drơ̆ng nơ̆r  hơtŏk loi dơ̆ng lui ngeh chĭnh trĭ ‘moi kiơ̆ pơma dơnuh khŭl kơdră kơpal, hơnơ̆ng tơlĕch jang đei yua dôm trong jang păng drơ̆ng nơ̆r jang hơdai 2 pang, hơdai hăm tơchĕng hơlen pơjing dôm trong jang ‘nao vă pơm ‘lơ̆ng  jang hơdai joăt jang đơ̆ng 2 teh đak; sơkơ̆t hơdăh mŭk drăm - mơdro sa ‘noh jĭ tơdrong tơm gĭt kăl lơ̆m tơdrong pơvei 2 teh đak, drơ̆ng nơ̆r hơtŏk tơlĕch jang tôm, đei yua tơdrong tơchơ̆t mơdro sa hiôk hian Việt Nam – EU (EVFTA). 2 kơdră chĕp kơ̆l drơ̆ng nơ̆r hơnơ̆ng tŭn pran tơdrong jang hơdai gĭt kăl găh pơm lăp hăm tŏ ‘mi kial tơplih, vei lăng đak, choh jang sa kơjăp, tơgop vang tơgŭm tơ jră hăm dôm long nol jơ̆p plei teh. Đơ̆ng rŏng kơ pơma đam, 2 Thủ tướng hlôi dơ̆ng lăng lêh pơjao 04 hla ar jang hơdai đơ̆ng dôm anih tơm, anih jang, khŭl jang 2 teh đak lơ̆m dôm tơdrong jang hơlen lăng păng iŏk jang kơjăp dôm tơmam drăm lơ̆m teh gĭt kăl, đak dơ sĭ, tơmơ̆t jên jang, mơdro sa.