Thủ tướng pơkăl rim bơngai tang măt akŏm hơlen tơdrong ming man, hơlen chă trong pơklaih tơnap tap, tơhlăk tơhlĭn lơ̆m tơdrong iŏk jang ming man, mă kăl noh gah tơdrong iŏk teh tơmăn jih trong. Tôm tơdrong pơyua ăn Teh đak, ăn kon pơlei, Thủ tướng teh đak pơkăl rim Anih jang tơm, rim tơring jang atŭm akŏm hơtŏk tơdrong ming man gơh sơđơ̆ng, trŏ pơkăp vei rơgoh cham char, tơdrong pơm jang.

Rim Anih jang tơm, rim tơring hơvơn anih jang chĭnh trĭ; hơvơn dôm khul jang, anih jang mŭk drăm vang jang dôm tơdrong ming man kăp gĭt kơ teh đak, tơdrong jang tơm noh gah Trong nơnăm, nhen hlôi vang dui tơlei unh hơyuh 500kV jăl 3 Quảng Trạch - Phố Nối, tơlĕch tơdrong jang pơlong 500 năr keh đang tơchơ̆t jơ̆p teh đak đei 3.000 km trong kơdâu renh lơ̆m sơnăm 2025.