Pơma ah Hop akŏm, Thủ tướng teh đak bơ̆n Phạm Minh Chính ră hơdah, tơdrong jang chư̆ng khuăn Việt Nam jing minh tơdrong jang kăp gĭt, minh tơdrong jang dơnơm gah jên hu pơma hơdrô̆ păng jang mŭk drăm sơkơ̆t xah hô̆i chuh nghia tơ̆ teh đak bơ̆n pơma hơtŭm; jing minh tơdrong jang hơbĕch hơbal, lơ bơngai jang; tơdrong hơvơn jên jang kăp gĭt ăn anih jang mŭk drăm; tơgop kăp gĭt hơtŏk jang mŭk drăm, jang kiơ̆ kôh phân hăm dôm anih jang mŭk drăm teh đak, tơplih ‘nao trong hơtŏk tơ-iung, hơtŏk mŭk drăm – tơpôl.

Gah sơnong jang tơm lơ̆m khei năr truh, Thủ tướng teh đak pơkăl Anih tơm Jên hu, Anih jang Chư̆ng khuăn Teh đak jang atŭm hăm Anih mong jên Teh đak, Anih tơm Asong jang atŭm hăm dôm anih jang tơm đei tơrĕk, akŏm pơjing păng tơlĕch jang kơtă hloi tơdrong jang hơdah gah pơm kiơ̆ Tơchơ̆t hơtŏk tơdrong jang chư̆ng khuăn truh sơnăm 2030.