Tơ̆ ‘măng hop akŏm, rim kơdră chĕp pơgơ̆r teh đak pơma dơnuh lăng hơlen ăn tơgop nơ̆r, tơchơ̆t 11 tơdrong ‘noh đei 6 tơdrong vă pơjing khôi luơ̆t ‘noh: Kon pơlei vang vei lăng rơvơ̆ng plĕnh; Vei lăng, iŏk yua ƀrơ̆m phao, tơmam đôh păng dôm tơmam au to (hơmet ming); Mŭk drăm joh ayŏ (hơmet ming); hơmet ming, tơmơ̆t dơ̆ng mĭnh apăng Khôi luơ̆t pơkăp ‘lơ̆ng păng Trŏ lăp kih thuơ̆t; hơmet ming, tơmơ̆t dơ̆ng mĭnh ƀar apăng kơ Khôi luơ̆t Dược.

Adoi lăng hơlen athei tơ iung pơjing rim khôi luơ̆t: Kơchư̆k, grat jang tơbôl; Gre păr (hơmet ming); Trong gre treng (hơmet ming): Groi teh păng Mŭk drăm lơ̆m teh; Kmăi kmŏk kơsô̆ hơgei; păng athei găh Tơdrong jang tơ iung pơjing khôi luơ̆t, khôi luơ̆t tơm sơnăm 2025, hơmet ming Tơdrong jang tơ iung pơjing khôi luơ̆t, khôi luơ̆t tơm teh đak sơnăm 2024. Kiơ̆ đơ̆ng Thủ tướng, 11 tơdrong đei lăng hơlen ăn tơgop nơ̆r, tơchơ̆t lơ̆m ‘Măng hop akŏm Khul kơdră teh đak khei 2/2024 jei dôm tơdrong kăl, tơnap, đei ƀơm lơ tơdrong truh tơ iung pơjing khôi luơ̆t tôm tong ‘lơ̆ng hơ iă, pơjing đei trong ‘lơ̆ng ăn atŏk tơ iung. Thủ tướng Teh đak athei rim Kơdră chĕp pơgơ̆r hơnih bơ̆ jang găh Khul kơdră chĕp pơgơ̆r teh đak atŏk jơhngơ̆m jang tơnăp, hơnơ̆ng chĕp pơgơ̆r, tơlĕch trong jang ‘lơ̆ng hơ iă vă tơ iung pơjing khôi luơ̆t, sơđơ̆ng ƀlep ‘lơ̆ng; akŏm khul jang, bơngai jang ăn bơ̆ jang tơ iung pơjing khôi luơ̆t...