Kiơ̆ tơbăt, tơdrong jang mŭk drăm-tơpôl khei 7 hơnơ̆ng đei tŏk ‘lơ̆ng hơ iă, iŏk đei jơnei ‘lơ̆ng hloh kơ khei 6, jô̆ atŭm 7 khei ‘lơ̆ng hloh dôm khei ou lơ̆m sơnăm sơ̆ lơ̆m rim tơdrong jang. Mă kăl ‘noh bơ̆ jang pơrô̆ chĕp pơgơ̆r trŏ lăp hloh, tơklep kơjăp hăm yan ou; Tŏk muk drăm đei pơtrŭt kơtang tơ̆ pơ đĭ 3 tơdrong jang kmăi kmŏk pơm tơlĕch tơmam drăm, choh jang sa, tĕch mơdro.

Dôm tơdrong jang kăl kơ mŭk drăm hơnơ̆ng tơplih ‘lơ̆ng hơ iă; lơ tơdrong jang tim keh đang đei akŏm hơmet pơ ‘lơ̆ng; Sơđơ̆ng tơpôl đei vei lăng kơjăp. Pơma pơtôch hop akŏm, Thủ tướng Phạm Minh Chính athei rim hơnih bơ̆ jang, rim tơring kăl hơnơ̆ng jang kiơ̆ hrơ̆p mĭnh ‘măng, tơlĕch jang kơtang rim tơdrong jang, trong tơlĕch ăn lơ̆m rim tơdrong hăm jơhngơ̆m đon: kơrŭn đĭ ai, iung jang kơtang, sơđơ̆ng đei iŏk yua kơjăp, hơdrin jang ‘lơ̆ng keh đang tôm tong trong tơlĕch jang, tơdrong jang kơ sơnăm 2024; Atŏk kơtang hloh dơ̆ng tơlĕch kon jên teh đak tơmơ̆t jang; 3 tơdrong jang tơm teh đak; hơnơ̆ng akŏm hơmet pơ ‘lơ̆ng rim tơdrong jang tim mă keh đang, pơdui đunh khei năr.