Kiơ̆ Hla bơar chih tơbăt đơ̆ng Hơnih tơm Pơprŏ Tơdrong jang păng Tơmơ̆t jên jang, mŭk drăm tŏk lơ̆m 9 khei tŏk kơtang hloh pơtêng hăm trong tơlĕch ăn, GDP Jăl III tŏk 7,4%, jô̆ hơtŏ 9 khei tŏk 6,82%. Pơđĭ 3 Tơdrong jang choh jang sa, kmăi kmŏk pơm tơlĕch tơmam drăm păng tech mơdro jei tŏk ‘lơ̆ng. Hơmet ming mŭk drăm hơnơ̆ng tơlĕch hơ iă. Găh trong jang tơm lơ̆m khei 10, jăl IV sơnăm 2024 păng khei năr ou kơnh Thủ tướng Phạm Minh Chính athei rim hơnih jang, tơring tơrang hơnơ̆ng iung jang hrơ̆ch mĭnh ‘măng, tơlĕch jang kơtang dôm trong bơ̆ jang: Iung jang kơtang-kơrŭn đĭ ai-hơdrin jang keh đang rim trong tơlĕch jang, tơdrong jang sơnăm 2024 pơjing đei hơyak pran ăn sơnăm 2025. Lơ̆m ou, jang keh đang tơdrong ming man hnam oei ăn rim ŭnh hnam hiong răm hnam oei kơ yuơ ‘mi kial hơbŭt hơbông pơrăm, atŏk kơtang tơlĕch kon jên jang teh đak 140.000 ti hlak jên vă pơm hnam oei tơpôl; mă pơđăm ‘noh atŏk kơtang choh jang sa pơm tơlĕch tĕch mơdro tơmam drăm pơjing đei tơdrong jang sa hơrih sa ăn kon pơlei, pơm hơtŏk jơhngơ̆m đon oei sa ‘lơ̆ng ăn kon pơlei, mă kăl ‘noh hơmet pơ ‘lơ̆ng đơ̆ng kial hơbŭt ou ki pơrăm păng atŏk kơtang teh đak tơmơ̆t jên jang vă pơjing hơyak pran ăn atŏk tơ iung mŭk drăm tơpôl.