Rim hla bơar tơbăt bơ̆ jang tơ̆ hop akom tơbăt, lơ̆m 11 khei sơnăm au, tơdrong tơlĕch kon jên tơmơ̆t jang teh đak jơnei dang 461.000 ti hlak jên, jơnei 65,1%, lơ hloh 6,77% pơtêng hăm sơnăm sơ̆ păng kơsô̆ lơ hlŏh pơtêng hăm sơnăm sơ̆ hloh 122.600 ti hlak jên. Mă đơ̆ng tơlĕch kon jên tơmơ̆t jang teh đak lơ̆m teh đak ‘lơ̆ng hloh pơtêng hăm sơnăm 2022, mă lei hrei au oei đei 41 hơnih tơm, hơnih bơ̆ jang Trung ương păng 24 tơring tơlĕch kon jên tơmơ̆t jang teh đak oei tŏ sĕt.

Tơ̆ hop akŏm, kơdră chĕp pơgơ̆r Khul kơdră teh đak păng rim hơnih tơm, hơnih bơ̆ jang, tơring tơbăt, tơdrong tơlĕch kon jên tơmơ̆t jang teh đak tơlĕch hiơ hiơ̆ kơ yuơ mĭnh ƀar tơdrong pơm ăn nhen: tơnap tap lơ̆m tơdrong jang hrŭ ăn iŏk tơvih teh; pơm hla bơar tơmơ̆t jên jang oei mơmat tat; mĭnh ƀar tơdrong tơchơ̆t khôi luơ̆t oei hơgrop ‘nao đei hơmet ming ... Pơma pơtôch hop akŏm, Thủ tướng Phạm Minh Chính pơma tơhlau kơtang rim hơnih tơm, hơnih bơ̆ jang, tơring tơlĕch jang hiơ hiơ̆; athei rim hơnih jang, tơring jang kiơ̆ kơjăp, hơmet pơ ‘lơ̆ng hloi, kiơ̆ đơ̆ng noh tơlĕch jang mă kơtang rim trong jang vă hơmet pơ ‘lơ̆ng tơlĕch kon jên tơmơ̆t jang teh đak tơ̆ hơnih bơ̆ jang, tơring bơ̆n tĕnh koăng păng jơnei.