Lăp đơ̆ng rŏng mơ̆ng rim nơ̆r tơgop, Thủ tướng Phạm Minh Chính pơma hơdăh, tơdrong jang khôi luơ̆t ăn tơdrong jang kiơ̆ trong tơlĕch jang kon jên jang tôm tong ling lang đei hơmet pơ ‘lơ̆ng. Rim hơnih pơtruh ăn hơnơ̆ng đei dăr lăng, hơmet pơ ‘lơ̆ng păng atŏk tơ iung trŏ lăp hloh. Bơ̆ jang pơrô̆ pơrôp hlôi jang ‘lơ̆ng, đei lơ trong jang ‘nao. Găh trong tơlĕch jang, Thủ tướng tơƀôh hơdăh kon pơlei kăl gơ̆h tŏk iŏk kon jên ‘lơ̆ng hơ iă, mă kăl kon pơlei oei tơ̆ tơring hơtăih yăih, tơring sơlam teh đak, achon dơsĭ, hŏk tro, sinh viên. ‘Moi kiơ̆ ‘măng iung jang gơ̆h hơgei 4.0 păng tơplih kơsô̆ vă đei trong chă tŏk iŏk sơđơ̆ng ‘lơ̆ng hơ iă kiơ̆ trong tơlĕch jang kơ teh đak, vă kơ bơ̆n pơm kiơ̆ ‘lơ̆ng hơtŏ hơnơ̆ng, sơđơ̆ng hơrih sa tơppôl lơ̆m tơdrong atŏk tơ iung.