Thủ tướng Teh đak sơkơ̆t hơdăh tơdrong tơgoăt tơgoăl Việt Nam - Brasil truh dang ei hlôi akŏm 5 tơdrong lei lăi dih băl, tơmơ̆t kăl ‘noh: đei trong hơ iă lei lăi dih băl, lui yom dih băl; đei tơdrong oei sa joăt hjoe vă lei lăi dih băl păng pơtrut dih băl kơtang; jei đei jơhngơ̆m đon hơpơi ‘meh vă rơngei hiôk hian. Thủ tướng Teh đak hơlen kiơ̆ dôm tơdrong lei lăi dih băl ‘noh, tơdrong tơgoăt tơgoăl Việt Nam – Brasil khei năr ou ki hlôi hơnơ̆ng ăn khul kơdră kơpal păng rim kơdră năm ngôi dih băl, jang mŭk drăm-mơdro sa tŏk kơjăp, adoi, ƀar păh jei iung jang hơdoi kơjăp tơ̆ rim ‘măng hop akŏm lơ pang. Pơma tơbăt drơ̆ng mĭnh nơ̆r hăm dôm trong hơlen đơ̆ng Thủ tướng Teh đak, ƀok Kơdră tơm Lula da Silva drơ̆ng nơ̆r gô iung jang hơdoi tơlĕch jang kiơ̆ rim trong jang atok kơtang hloh dơ̆ng tơgoăt tơgoăl ƀar teh đak lơ̆m khei năr kơnh, pơ đĭ atŏk kơtang ăn khul kơdră kơpal tơƀơ̆p dih băl, năm ngôi dih băl, mă kăl khul kơdră kơpal; iung jang hơdoi tơlĕch jang kiơ̆ jơnei rim hla bơar pơkăp jang hơdoi hlôi đei kĭ pơkăp.