Iung pơma tơ̆ pơma đam, Ƀok kơdră tơm Nga Vladimir Putin chơt hơ iă păng bơnê kơ Thủ tướng Teh đak Phạm Minh Chính atŭm hăm Khul kơdră kơpal Việt nam hlôi vang năm Hop akŏm. Ƀar păh chơt hơ iă ƀôh hơdăh tơdrong tơgoăt Jang hơdoi gĭt kăl tôm tong lơ̆m khei năr ou ki hơnơ̆ng hơmet pơ ‘lơ̆ng păng atŏk tơ iung ‘lơ̆ng liĕm; rim ‘măng năm tơmang, rim ‘măng tơƀơ̆p dih băl rim kơdră, mă kăl kơdră kơpal đei pơgơ̆r ‘lơ̆ng hơ iă; tĕch mơdro dih băl iŏk jơnei kơtang. Ƀar ‘nu kơdră chĕp pơgơ̆r akhan, tơdrong iok đei ou tim gan tơgăl hăm trong tơlĕch ăn, kăl iung jang hơdoi kơjăp hloh dơ̆ng vă tơlĕch jang kiơ̆ jơnei lơ̆m jang hơdoi, mă kăl lơ̆m tơdrong jang mŭk drăm, tơmơ̆t jên jang, tơmang pơhiơ̆. Thủ tướng Phạm Minh Chính hăm Ƀok kơdră tơm Vladimir Putin jei pơma dơnuh rim trong vă iung jang păng trong jang hơdăh vă atŏk kơtang hloh dơ̆ng iŏk đei jơnei lơ̆m jang hơdoi găh rim tơdrong anai nhen khoa hŏk-kmăi kmŏk, pơtho pơhrăm, trong gre nơnăm.