Ƀar ‘nu Kơdră chĕp kơ̆l tơƀôh đon lui, tơ̆ hơnăp kơnh vă hơnơ̆ng adrin pơm hơtŏk tơdrong pơvei, jang hơdoi gĭt kăl tôm tơdrong Việt Nam - Hàn Quốc tŏk pran hlŏh dơ̆ng, ‘lơ̆ng păng đei yoa hlŏh dơ̆ng. 2 păh drơ̆ng nơ̆r hơtŏk tơdrong pơma nuh, tơƀâp băl ăn kuan tih; hơtŏk tơdrong jang hơdoi găh khul linh, vei sơđơ̆ng teh đak; tưk tơiung tơdrong jang hơdoi găh mŭk drăm, tĕch mơdro, hơmet pơ ‘lơ̆ng dôm tơdrong pơmat tat oei găn trong, pơjing tơdrong hiôk hian ăn tơmam drăm gơ̆h mât tĕch mơdro tơ̆ băl, kŭm nhen jang hơdoi găh dôm tơdrong ‘nao, đei lơ tơdrong ‘lơ̆ng nhen khoa hŏk kơmăy kơmŏk, tơplih ‘nao rơgei, tơchĕng hơlen păng jang tŏk. 

Thủ tướng Phạm Minh Chính pơma hơdăh Việt Nam vă hơnơ̆ng pơjing tơdrong hiôk hian ăn dôm bơngai tơmât jên jang đơ̆ng Hàn Quốc truh jang xa đunh đai tơ̆ Việt Nam; athei Hàn Quốc hơnơ̆ng pơih xă anih tĕch mơdro ăn tơmam Việt Nam, mă loi jĭ dôm tơmam đơ̆ng choh jang xa tĕch tơ̆ Hàn Quốc; pơtruh jên asong tŏk iŏk hăm jên kon tŏ sĕt ăn Việt Nam vă tơlĕch jang dôm tơdrong jang pơm trong, man anih gĭt kăl nhen trong gre treng, trong gre kơdâu hrĕnh.