Pơma pơtôch ‘măng pơma đam, Thủ tướng Phạm Minh Chính pơma hơdăh tơdrong tơgoăt tơgoăl ƀar teh đak tim lăh đei ‘lơ̆ng liĕm nhen hrei ou lơ̆m rim tơdrong, tŏk bŏk atŏk tơ iung kơtang păng ‘lơ̆ng liĕm. Lơ tơdrong rơvơn jang hơdoi hơnơ̆ng đei tơlĕch ăn.

Hôn bơnê kơtang dôm nơ̆r tơgop tơ̆ pơma đam, Thủ tướng tơbăt, ling lang ‘meh vă mơ̆ng dôm nơ̆r tơgop tơpă, tơpăt păng drơ̆ng chă pơma dơnuh dih băl găh rim nơ̆r tơgop, tơlĕch ăn trŏ lăp đơ̆ng rim Grŭp jang, hơnih mơdro sa kơ Hàn Quốc, lơ̆m ou đei lơ grŭp jang, hơnih mơdro sa hlôi tơmơ̆t jên jang tơ̆ Việt Nam. Thủ tướng hôn bơnê păng ‘meh vă rim grŭp jang kơ Hàn Quốc hơnơ̆ng tơmơ̆t jên jang, jang hơdoi hăm Việt Nam, atŭm dih băl atŏk kơtang “trong jang hơdoi ‘nao”, ‘moi kiơ̆ trong jang “jơ̆p lơ̆m plei teh, tôm tong, pơđĭ kon pơlei”, lăng truh trong tơlĕch ăn iŏk đei mơdro sa dih băl hloh 100 ti USD lơ̆m sơnăm 2025 păng 150 ti USD lơ̆m sơnăm 2030.