Lơ̆m tơdrong hơ-iă tơbôl kăp gĭt, ƀar Thủ tướng bơnê kơ dôm tơdrong hơtŏk hơ-iă kăp gĭt lơ̆m tơdrong tơbôl kơ 2 pah Việt Nam păng Ả-rập Xê-út lơ̆m 25 sơnăm kơ âu păng drơ̆ng nơ̆r jang hadoi kơjăp vă ‘nhăk tơdrong jang tơbôl tŏk minh jăl ‘nao. Kiơ̆ kơ noh, ƀar ƀok kơdră drơ̆ng nơ̆r hơtŏk asong khul kơpal năm hơpeh hơpong dih băl, mă kăl noh khul kơpal kơ 2 pah hơnơ̆ng năm hop akŏm lơ teh đak; hơ-‘nhăk tơdrong jang hadoi gah mŭk drăm jing tơdrong jang dơnơm lơ̆m tơdrong jang tơbôl 2 pah, pơkăp Ả-rập Xê-út jing minh lơ̆m dôm teh đak asong jang pran hloh tơ̆ Việt Nam păng pơkăp truh tơdrong hơtŏk tơmam drăm tĕch răt kơ 2 pah đei yua hloh 10 tih USD ah sơnăm 2030.

Sơkơ̆t hơdah tơdrong tơm jang hadoi kơ 2 teh đak noh tơplih ‘nao kiơ̆ pơkăp trong jang tơplih jơk, tơplih jang kiơ̆ kơmăi kơmŏk ‘nao; ‘nhăk tơdrong pơtho pơhrăm, tơmang pơhiơ̆, asong bơngai jang hơpeh hơpong kon pơlei jing tơdrong tơm dơnơm kơjăp ăn tơdrong jang tơbôl kơ 2 teh đak.