Thủ tướng Teh đak Phạm Minh Chính tơbăt hăm Kơ ieng Kơdră tơm, Thủ tướng UAE găh dôm tơdrong jơnei gĭt kăl kơ Việt Nam iŏk đei, mă kăl lơ̆m tơdrong jang mŭk drăm. Đơ̆ng rŏng pơma đam, ƀar ‘nu kơdră chĕp pơgơ̆r vang năm pơm lêh Kĭ pơkăp Tơdrong tơchơ̆t Jang hơdoi Mŭk drăm Tôm tong, Tơdrong tơchơt Mơdro sa hiôk hian mă blŭng kơ Việt Nam hăm mĭnh teh đak Ả-rập. ‘Nou jei jing Tơdrong tơchơt mơdro sa hiôk hian đei jơ ‘năr pơma đam keh đang koăng hloh kơ Việt Nam, tơbăt hơdăh hơdrin đĭ ai đơ̆ng Kơdră chĕp pơgơ̆r adoi nhen rim hơnih tơm, hơnih bơ̆ jang ƀar teh đak vă pơjing hơyak pran kơtang tơgoăt tơgoăl jang hơdoi mŭk drăm, mơdro sa, tơmơ̆t jên jang ƀar teh đak, pơih trong ‘lơ̆ng ăn Việt Nam vang mơt mơdro sa lơ̆m tơring Trung Đông. Hăm rim tơdrong pơma đam tôm tong, tơdrong tơchơ̆t gô hơnhăk đei ‘lơ̆ng hơ iă ăn pơ đĭ ƀar teh đak.