Tơ̆ jơ pơma điê̆n thoăi, Thủ tướng teh đak bơ̆n Phạm Minh Chính sơkơ̆t hơdah, trong jang drơ̆ng minh đơ̆ng Việt Nam hơnơ̆ng lăng tơgĭt hơtŏk tơbôl Jang tôm tơdrong hăm Hà Lan. Ƀar pah drơ̆ng nơ̆r jang hadoi kơjăp hơtŏk năm tơmang dih băl đe Kơdră kơpal Việt Nam đơ̆ng Ƀok Pơtao păng Hơkăn ƀok pơtao Hà Lan lơ̆m khei năr truh; pơtoi iŏk trong hiôk đơ̆ng Tơchơ̆t jang Tĕch pơdro hiôk hian Việt Nam - EU (EVFTA), hơdrin hơtŏk tơmam tĕch răt kơ 2 pah đei 15 tih đôlar lơ̆m khei năr truh.

Ƀar pah hadoi pơma đam gah minh ƀar tơdrong đei ƀôh lơ̆m apŭng plenh teh păng lơ̆m tơring mă 2 pah atŭm tơrĕk truh. Tơdrong đei ƀôh tơ̆ Biển Đông, 2 Thủ tướng ră hơdah tơdrong kăp gĭt kơ tơdrong vei sơđơ̆ng, hiôk hian vih vơ̆t tơ̆ đak dơsĭ păng sek tơlang tơdrong rơngei lơ̆m dôm tơdrong tơgar đei sek tơlang kiơ̆ luơ̆t apŭng plenh teh, mă kăl noh UNCLOS 1982.