Tơ̆ pơma dơnuh, Thủ tướng Teh đak Phạm Minh Chính pơma tơbăt jơhngơ̆m đon chơt hơ iă tơ̆ hơnăp atŏk tơ iung kơtang, tôm tong păng ‘lơ̆ng hơ iă kơ tơgoăt tơgoăl jang hơdoi Việt Nam - Nhật Bản. Kiơ̆ kơ ‘noh, Nhật Bản ‘nŏh teh đak jang hơdoi kơsô̆ 1 găh ODA, dơ̆ng mă 2 găh bơngai jang, dơ̆ng mă pêng găh tơmơ̆t jên jang păng dơ̆ng mă puăn găh mơdro sa; Sơkơ̆t hơdăh, Việt Nam ling lang lăng Nhật Bản ‘nŏh teh đak jang hơdoi gĭt kăl hlŏh păng đunh đai tai sơnăm. 

Thủ tướng Teh đak Phạm Minh Chính athei Kơdră chĕp pơgơ̆r Hạ viện Nhật Bản Nukaga Fukushiro păng Hạ viện Nhật Bản lăng ba kơjăp, tơgŭm djru atŏk kơtang tơgoăt tơgoăl jang hơdoi lơ tơdrong Việt Nam - Nhật Bản kiơ̆ trong tơgoăt tơgoăl ‘nao Jang hơdoi gĭt kăl tôm tong; atŏk kơtang jang hơdoi, tơƀơ̆p dih băl Kuô̆k hô̆i ƀar teh đak, atŏk kơtang ăn khul kơdră kơpal tơƀơ̆p dih băl, pơgơ̆r tơƀơ̆p dih băl ƀar păh Nghĭ sy, Nghĭ sy mơlôh ƀar teh đak. Tơgŭm djru păng pơtrŭt kơtang tơgoăt ƀar păh jang mŭk drăm, tơgŭm Việt Nam tơ iung pơjing tơdrong jang mŭk drăm pơm tơm kơdih.