Ƀar ‘nu kơdră chĕp pơgơ̆r drơ̆ng mĭnh nơ̆r hơdrin pơjing hơyak hle lơ̆m jang hơdoi găh tơdrong jang păng pơtho pơhrăm. Thủ tướng Teh đak Phạm Minh Chính athei ƀar păh hơnơ̆ng pơma dơnuh rim ‘măng năm tơmang, mă kăl ‘noh kơdră kơpal; pơjing rơvơn ăn rim tơmam drăm gĭt kăl chă tĕch răt dih băl nhen prit, krô̆i hroi Việt Nam păng kiwi, cherry kơ New Zealand; atŏk kơtang tơgoăt trong đak, trong gre păr; pơtrŭt kơtang jang hơdoi joh ayŏ, kon pơlei năm ngôi dih băl; rim hơnih bơ̆ jang pơjing khôi luơ̆t hơnơ̆ng atŏk kơtang hơnăp jang lơ̆m hơmet pơ ‘lơ̆ng păng pơm kơtang hloh dơ̆ng tơgoăt tơgoăl Jang hơdoi gĭt kăl Việt Nam - New Zealand, pơma dơnuh dih băl găh tơdrong tih kơ teh đak, iung jang hơdoi pơtrŭt kơtang jang kiơ̆ rim tơdrong drơ̆ng mĭnh nơ̆r kĭ pơkăp ƀar păh.