Iung pơma tơ̆ jơ tơƀơ̆p, Thủ tướng Phạm Minh Chính pơma tơbăt jơhngơ̆m đon lui ‘măng năm tơmang gô jơnei ‘lơ̆ng hơ iă, pơjing hơyak pran atŏk kơtang tơgoăt tơgoăl joăt joe păng jang hơdoi lơ tơdrong Việt Nam – Phần Lan.

Thủ tướng tơbăt ăn Kơdră chĕp pơgơ̆r Kuô̆k hô̆i Phần Lan găh trong jang tơbôl adoi nhen dôm trong jang păng iŏk đei jơnei atŏk tơ iung mŭk drăm-tơpôl kơ Việt Nam; athei Kuô̆k hô̆i Phần Lan tơgŭm djru tơdrong Hơnih bơ̆ jang châu Âu (EC) hrôih hŭt "găn ga" (IUU) hăm ka hơdang Việt Nam; pơtrŭt rim Kuô̆k hô̆i rim teh đak lơ̆m khul EU hrôih kĭ tơchơ̆t Tơdrong tơchơ̆t tơgŭm dŏng tơmơ̆t jên jang Việt Nam - Jơnŭm atŭm châu Âu (EVIPA) păng lui akhan EVIPA gô tơgŭm hơnih mơdro sa rim teh đak năm tĕch mơdro dih băl păng lơm tơring. Thủ tướng Phạm Minh Chính jei athei ƀar păh chă tơchĕng hơlen rim tơdrong kĕ jang hơdoi pơtho pơhrăm ‘nao găh pơtho tơdrong jang, tơbăt dih băl trong jang hơgei tơ iung pơjing pơtho pơhrăm hơgei, pơjing rơvơn ăn kon pơlei Việt Nam hơrih sa, jang sa păng hŏk pơhrăm sơđơ̆ng tơ̆ Phần Lan, tơgop pơm gơng tơroh kloh klĕch dih băl tơgoăt tơgoăl păng jang hơdoi ƀar teh đak.