4 tơdrong jang ‘nâu đei jên jang hlŏh 15 rơbâu ti, đei pơgơ̆r et hơtŏk hrơ̆ch 1 ‘măng lơ̆m ‘năr 24/12 tơ̆ 4 anih pơih pơdă ‘nŏh: plt Điện Biên, Tuyên Quang, Tiền Giang păng Vĩnh Long. ‘Nâu jĭ dôm tơdrong jang pơm trong gĭt kăl đei et hơtŏk lơ̆m sơnăm 2023 păng bơ̆ jang ‘lơ̆ng kiơ̆ trong tơlĕch, khei ‘năr hơgăt. Tơdrong gĭt kăl hăm 4 tơdrong jang ‘nâu ‘nŏh đei jang đang ‘lơ̆ng kiơ̆ trong klăih song hơnăp jang ăn tơring, mong akŏm jên jang ‘ngoăih kơ jên teh đak.

Pơma tơ̆ jơ pơm lêh, Thủ tướng Phạm Minh Chính tơchĕng ‘lơ̆ng, chih răk păng pôk pơ ư tơdrong adrin, đon jang tơnăp đơ̆ng Anih tơm vei lăng trong nơnăm, dôm dêh char, plt đei pơjao bơ̆ jang, pơma hơdăh, đơ̆ng tơdrong jang đei tôch gĭt kăl âu roi hơmet kơjăp hlŏh dơ̆ng jơhngâm đon jang rơgei mưh bơ̆ jang dôm tơdrong jang tơm vă atŏk tơiung mŭk drăm, tơpôl. Thủ tướng tơtă, rim bơngai vang jang athei hơtŏk đon jang tơnăp mưh bơ̆ jang, đon tơnăp hăm anih jang; tơplih ‘nao đon tơchĕng, trong jang vă gơ̆h jang đang ‘lơ̆ng rim tơdrong vang tơgop jang kĕh trŏ năr hơgăt.