Pơgê 8/8, pơma pơtôch hop akŏm Anih pơgơ̆r jang kơ teh đak găh dôm tơdrong jang tơm, gĭt kăl kơ teh đak tơ̆ anih vei lăng trong nơnăm, Thủ tướng Phạm Minh Chính athei dôm tơ ‘ngla tơmât jên jang, dôm anih iŏk jang vang jang hơdoi hăm dôm tơring jăh hơmet pơ ‘lơ̆ng dôm tơdrong pơmat tat, tơhlăk tăk, hơmet ming dôm tơdrong tam mă pran ‘lơ̆ng tơ̆ dôm tơdrong jang pơm trong gre hrei ‘nâu. 

Akŏm đĭ đăng tơdrong jang pơm trong gre kơdâu hrĕnh oei đei tơlĕch jang dang ei dang 1.700 km tơ̆ jơ̆p tơring lơ̆m teh đak, lơ̆m noh đei dang 1.200 km tơdrong jang gô jang đang lơ̆m sơnăm 2025 vă gơ̆h iŏk đei đĭ đăng kơsô̆ km trong gre kơdâu hrĕnh lơ̆m teh đak tŏk truh 3.000 km. Thủ tướng athei, dôm anih tơm, anih jang kơpal, tơring tơrang, mă loi jĭ dôm tơ ‘ngla tơmât jên jang, anih iŏk jang adrin jang kiơ̆, bơ̆ jang đei yoa ‘lơ̆ng tơdrong pơjei băl “500 măng năr jang tơm, khŏm bơ̆ jang kĕh dôm tơdrong jang pơm trong gre kơdâu hrĕnh” vă hơiă kơ Hop akŏm Đảng jơ̆p tơring, năm truh Hop akŏm Đảng lơ̆m teh đak ‘măng mă XIV, tơbăt 80 sơnăm Năr pơjing teh đak, 50 sơnăm Năr tơblăh iŏk rơngei tơring Pơbăh, pơjing đei mĭnh teh đak kơjăp ‘lơ̆ng.