Drơ̆m kơsơ̆ ‘năr 11/10, gre păr chơ Thủ tướng Phạm Minh Chính kŭm hăm khŭl tang măt kơdră kơpal Việt Nam vang Hop akŏm Kơdră kơpal ASEAN ‘măng mă 44, 45 păng dôm Hop akŏm Kơdră kơpal ƀơm truh tơ̆ Viêng-chăn, Lào, đơ̆ng ‘năr 08 truh ‘năr 11/10/2024 hlôi brŏk tơ̆ teh đak, pơtôch ‘măng năm jơnei ‘lơ̆ng hơiă. Lơ̆m 4 năr Hop akŏm đei vă jê̆  20 tơdrong jang, hloh 30 ‘nu Kơdră chĕp kơ̆l dôm teh đak ASEAN păng teh đak jang hơdai  vang truh akŏm, dang 90 hla ar kăl đei pơdrơ̆ng kiơ̆ păng chih iŏk.

Hăm jơ bơ̆jang hơnơ̆ng lơ̆m 4 năr, Thủ tướng teh đak păng dôm bơngai jang lơ̆m khŭl hlôi vang truh akŏm hloh 60 tơdrong jang pơđĭ 2 pang păng lơ pang, sơkơ̆t hơdăh um rup kơchăng, hơdrin păng tơnăp đơ̆ng Việt Nam, hơdai hăm tơgop pơtrŭt tơdrong pơvei đơ̆ng Việt Nam hăm dôm teh đak jang hơdai. Hop akŏm Kơdră kơpal ASEAN ‘măng mă 44, 45 păng dôm Hop akŏm ƀơm truh hlôi jơnei ‘lơ̆ng hơiă, pơtôch sơnăm pơm Kơdră ASEAN 2024 đơ̆ng Lào. Thủ tướng Phạm Minh Chính hlôi đei dôm ‘măng tơƀơ̆p hăm Thủ tướng Lào păng Thủ tướng Campuchia, vang hơdai băl sơkơ̆t hơdăh tơdrong joăt joe păng kơjă kăp gĭt đơ̆ng 1 jơhngơ̆m đon Việt Nam-Lào-Campuchia; drơ̆ng nơ̆r hơnơ̆ng jang hơdai hơnhăk tơdrong pơvei jang hơdai 3 teh đak roi ‘năr roi ‘lơ̆ng păng đei yua, pơm lăp hăm ‘meh vă tơpă đơ̆ng 3 teh đak păng lăp hăm ‘meh vă hơtŏk tơiung lơ̆m jăl jang ‘nao.