Lơ̆m 2 năr bơ̆jang hơnơ̆ng hăm hloh 30 tơdrong jang, ‘măng bơ̆jang đơ̆ng Thủ tướng Phạm Minh Chính vang Hop akŏm WEF Davos ‘măng mă 54 hlôi jơnei ‘lơ̆ng hơiă tơ̆ lơ tơdrong, iŏk đei tơ̆ kơ sô̆ lơ đĭ đăng dôm tơdrong hơgăt, ‘meh vă hơnăp jang tơlĕch ăn, hơnhăk ăn tơdrong hơiă păng păr ang pran kơtang um rup kơ mĭnh Việt Nam hăm tơdrong ‘lơ̆ng, anih dơ̆ng păng bưng ai ‘nao. Dôm nơ̆r iung pơma đơ̆ng Thủ tướng hlôi tơroi dôm nơ̆r pơma rơđăh ‘lơ̆ng găh teh đak Việt Nam hơtŏk tơiung hrĕnh, tơplih ‘nao, jĭ hơnih truh tơmơ̆t jên jang hơiă ăn kơ rim grŭp jang jơ̆p plĕnh teh.

‘Măng năm ngôi tơ̆ Hungary păng Romani lăp đơ̆ng rŏng kơ vang Hop akŏm WEF Davos đơ̆ng Thủ tướng Phạm Minh Chính kŭm hlôi jơnei ‘lơ̆ng hơiă. Lơ̆m jơnăr năm ngôi, Thủ tướng Phạm Minh Chính hlôi đei hloh 30 ‘măng tơƀơ̆p, pơma dơnuh hăm đĭ đăng kơdră chĕp kơ̆l gĭt kăl kơ teh đak, Khŭl kơdră teh đak, Kuôk hô̆i, đảng chĭnh trĭ 2 teh đak, pơma tơdrong jang tơgŭm tơ̆ dôm hnam trưng đăi hŏk, vang hop akŏm anih mơdro sa, tơƀơ̆p khŭl tơbôl 2 teh đak hăm Việt Nam, tơƀơ̆p tơpôl kon pơlei bơngai Việt păng năm lăng tơ̆ 1,2 anih jang mŭk drăm, khoa hŏk ki thuơ̆t.