‘Nau ‘măng năm tơ̆ Trung Quốc blŭng a đơ̆ng ƀok Phạm Minh Chính hăm kơchư̆k Thủ tướng Teh đak. ‘Măng năm tơmang jơnei ‘lơ̆ng hơ iă păng iŏk đei jơnei hơ iă.

Lui kiơ̆ dih băl chinh trĭ kơ ƀar teh đak hlôi đei atŏk pran kơtang, pơjing hơyak kăl vă pơtrŭt kơtang păng pơm hơ iă hloh dơ̆ng tơgoăt tơgăl Jang hơdoi git kăl tôm tong Việt - Trung lơ̆m chăl hle, hơnhăk đei iŏk yua hơ iă ăn kon pơlei ƀar teh đak. Thủ tướng bơ̆n pơma đam, pơma dơnuh hăm pơđĭ 4 ‘nu kơdră tơm dơnơm kơ Trung Quốc. Ƀar păh jei pơma hơdăh tơdrong kăl kơ atŏk kơtang lui kiơ̆ dih băl chinh trĭ, xek tơlang trŏ lăp păng dăr lăng ‘lơ̆ng dôm tơdrong ưh kơ lăp dih băl, hơnhăk tơgoăt tơgoăl jang hơdoi gĭt kăl tôm tong Việt Nam - Trung Quốc atŏk tơ iung sơđơ̆ng, ‘lơ̆ng hơ iă đunh đai. ‘Ngoăih dôm tơdrong jang tơm, Thủ tướng Teh đak vang năm păng iung pơma tơ̆ Hop akŏm hơnih mơdro sa Việt Nam - Trung Quốc, hăm vang năm đơ̆ng lơ hơnih mơdro sa Trung Quốc, tơƀơ̆p rim bơngai hŏk jrŭ tơgoăt tơgoăl, tơƀơ̆p pơma dơnuh hăm lơ hơnih mơdro sa tơm kơ Trung Quốc, năm lăng Hơnih ‘nao Hùng An - tơring kơdrơ̆m gơ̆h hơgei chăl hle găh trong plôih ‘măng păng tơplih ‘nao tơchăr kơ Trung Quốc tơ̆ dêh char Hà Bắc ... Rim hơnih mơdro sa jei hôn bơnê kơtang trong jang ‘lơ̆ng păng hơmŏ hơ iă tơmơ̆t jên jang kơ Việt Nam, adoi pơma tơbăt jơhngơ̆m đon ‘meh vă tơmơt jên jang lơ̆m Việt Nam lơ̆m khei năr kơnh.