‘Măng năm hơpong đơ̆ng Thủ tướng Phạm Minh Chính tơ̆ Romania ‘măng mă âu jĭ tơdrong pơgơ̆r ăn khul pơma nuh mă blŭng đơ̆ng Thủ tướng 2 teh đak đơ̆ng rŏng 5 sơnăm. Lơ̆m ‘măng năm hơpong, Thủ tướng Phạm Minh Chính đei dôm ‘măng pơma đam, pơma nuh hăm Thủ tướng, Kơdră tơm, Kơdră Thượng viện, Kơdră Hạ viện Romania.

Kŭm hăm ‘nŏh, Thủ tướng vă năm ngôi tơ̆ tơring, Hnam trưng đăi hŏk; Hop akŏm anih tĕch mơdro Việt Nam - Romania; sơng grŭp tang măt ăn Khul jang tơbôl Romania-Việt Nam păng tơƀâp kăn ƀô̆, bơngai jang ăn Anih tang măt păng tơpôl bơngai Việt Nam tơ̆ Romania. ‘Măng năm hơpong vă pơm pơ ‘lơ̆ng hlŏh dơ̆ng tơdrong pơvei, jang tơbôl đơ̆ng sơ̆ păng jang hơdoi tôm tơdrong đơ̆ng Việt Nam – Romania, pơjing jơhngâm pran tưk tơiung tơdrong jang hơdoi 2 pang găh rim tơdrong pran ‘lơ̆ng đơ̆ng Romania păng lăp hăm tơdropng ‘mĕh vă jang tŏk đơ̆ng Việt Nam.

Pơgê 21/1 (jơ tơring), Thủ tướng Phạm Minh Chính hlôi năm ngôi tơ̆ Anih jang tơchĕng hơlen păng Hơtŏk tơiung tin học teh đak Romania (ICI).  Tơƀôh jơhngơ̆m chơt hơiă păng kơ kuh chhôk ‘nă kơ Thủ tướng Phạm Minh Chính – kơdră chĕp kơl Anih jang Tơchĕng hơlen păng Hơtŏk tơiung tin học teh đak Romania (ICI) tơbăt, ICI đei hơnăp jang gĭt kăl lơ̆m pơtho bơngai jang kơmăy kơmŏk kơtơ̆ng ang; hlôi tơgop tưk tơiung ăn tơdrong hơgei, hơtŏk tơiung kơ Romania. Dôm tơdrong jang tơchĕng hơlen păng tơmơ̆t yua kơmăy kơmŏk đơ̆ng ICI ưh khan lăp hơnhăk ăn dôm trong jang hơgei mă oei tơgop lơ̆m tơdrong iŏk yua ‘lơ̆ng dôm kon jên, tơmam păng tơplih ‘lơ̆ng tơdrong arih sa.

Iung pơma tơ̆ âu, Thủ tướng Phạm Minh Chính tơbăt, Việt Nam hlôi pơjing păng tơlĕch jang tơdrong tơplih kơ sô̆ teh đak; tơdrong jang teh đak găh tơchĕng hơlen, hơtŏk tơiung păng iŏk yua tơdrong hơgei pơm kơ dih; pơjing Anih Tơplih ‘nao pơcheh hơgei Teh đak....; athei Anih jang ICI Romania lăng Việt Nam jĭ 1 teh đak jang hơdai hơdrol lơ̆m tơdrong jang pơih xă jang hơdai apŭng plĕnh teh, tơgŭm Việt Nam pơtho bơngai jang ‘lơ̆ng lơ̆m tơdrong jang ‘nâu.

Hơdrol ‘noh, Thủ tướng Phạm Minh Chính hlôi năm ngôi tơ̆ Anih Mơdro sa păng Kơmăy kơmŏk dêh char Prahova păng tơƀơ̆p hăm kang ƀô̆, bơngai jang kơ Anih jang tang măt, tơpôl bơngai Việt Nam tơ̆ Romania.