Kiơ̆ roi tơbăt, 9 khei mŭk drăm - tơpôl kơ teh đak iŏk đei lơ jơnei gĭt kăl, lơ hloh kơ khei ‘nâu kơ sơnăm sơ̆ tơ̆ vă đĭ đăng dôm tơdrong jang. Jô̆ pơhlom pơđĭ sơnăm đei 14/15 tơdrong hơgăt jang đei păng yak hloh trong tơlĕch jang. Mŭk drăm tih hơnơ̆ng sơđơ̆ng, hơtŏk kơjă lơ đei vei lăng, mŭk drăm tŏk lơ hloh tơdrong hơgăt tơlĕch ăn. Găh dôm hơnăp jang, trong jang dôm khei hơtuch sơnăm 2024, Thủ tướng Phạm Minh Chính tơroi rơđăh: Rim kơdră, rim anih jang, rim tơring kiơ̆ lơ̆m kơchư̆k jang, tơdrong gơh jang hơnơ̆ng akŏm jang kiơ̆ hrơ̆ch, đei yua dôm hơnăp jang, trong jang lơ̆m rim tơdrong jang.

Lơ̆m noh, hơnơ̆ng hơdrin hơmet pơ ‘lơ̆ng hiong răm đơ̆ng ‘mi kial pơrăm, mă loi ‘noh jĭ kial hơbŭt kơsô̆ 3; Kơchăng, hơdrin hơvơn tôch ai rim kon jên vă tơlĕch jang hloi dôm tơdrong jang tơgŭm, lơ̆m noh vei sơđơ̆ng ưh kơ lê̆ kon pơlei ưh kơ măh sŏng sa, ưh kơ măh hơbăn ao hrŭk, ưh kơ đei hơnih oei; đe mon hŏk tro athei gơh truh tơ̆ hnam trưng, bơngai jĭ đei gơh ming hơmet; tơgŭm kon yŏng, ‘long hơdrĕch, tơiung păng hơtŏk tơiung choh jang sa, bri ‘long, ka hơdang.