Thủ tướng teh đak bơ̆n Phạm Minh Chính ră hơdah Vân Nam đei anih dơ̆ng kăp gĭt lơ̆m tơdrong jang tơbôl Việt - Trung. Việt Nam păng Vân Nam đei lơ mŭk drăm, tơdrong hiôk vă hơtŏk jang hadoi, đei lơ tơdrong 'lơ̆ng vă hơtŏk dih băl, atŭm hăm noh hơpơi 'meh, tơdrong kăl kơ 2 pah lơ̆m tơdrong jang tĕch răt tơmam drăm kơdih băl noh tih tên hloh.

Thủ tướng pơtruh nơ̆r hăm dêh char Vân Nam yuk hơlâu lơ̆m tơdrong pơm kiơ̆ pơkăp atŭm, hơtŏk chă hơpeh hơpong dih băl đơ̆ng dôm tơring tơ̆ Việt Nam. Thủ tướng adoi hơpơi 'meh, 2 pah jang atŭm kơjăp lơ̆m tơdrong jang vei lăng sơđơ̆ng sơlam teh kiơ̆ 3 hla bar pơkăp gah sơlam teh păng dôm tơchơ̆t đei tơrĕk truh, jang atŭm tơnăp dôm tơdrong jang tơbăt 25 sơnăm kĭ pơkăp Tơchơ̆t Sơlam teh păng 15 sơnăm kĭ 03 hla bar pơkăp khôi luơ̆t gah sơlam teh lơ̆m sơnăm 2024.