Thủ tướng sơkơ̆t hơdah, Việt Nam hơnơ̆ng lăng tơgĭt tơbôl Việt Nam–Israel. Bơnê kơ 2 teh đak jang mŭk drăm đei lơ tơdrong pran tơgŭm dih băl, Thủ tướng pơkăl 2 pah dah hrôih tơlĕch jang đei jơnei Tơchơ̆t Tĕch pơdro hiôk hian Việt Nam–Israel păng hơlen pơma đam, kĭ tơchơ̆t drơ̆ng nơ̆r jang hadoi gah kŏng ngĭp kơ 2 teh đak; pơm trong hiôk ăn dôm tơdrong jang asong khul jang mŭk drăm, jang hadoi tơlĕch tĕch pơdro kơ ƀar teh đak; Israel hơtŏk răt tơmơ̆t tơmam drăm mă Việt Nam jang pran nhen ka hơdang, 'nhot, plei 'long sa păng tơmam yua.

Thủ tướng pơkăl, 2 pah hơtŏk pran jang hadoi gah tơplih 'nao gơh hơgei, jang kiơ̆ trong jang 'nao, jang hadoi vă tơjră hăm hơyuh tô̆ 'mi tơplih, lơ̆m noh đei tơdrong jang tơjră hăm tŏ phang pơđang tơ̆ dôm dêh char Tŏk bŏk; pơtho bơngai jang gơh hơgei.