‘Nâu jĭ Grŭp jang kơmăy kơmŏk tơroi tơbăt tơm hlŏh kơ teh đak Ấn Độ, hăm kơsô̆ jên jang dang 70 ti USD, đei hlŏh 320.000 ‘nu bơngai jang păng iŏk yoa sơnăm 2023 đei hlŏh 18 ti USD. Thủ tướng Phạm Minh Chính tơƀôh đon hơiă găh tơdrong jang xa, hơnăp jang păng anih dơ̆ng đơ̆ng Grŭp jang Infosys, kŭm nhen hơnăp jang đơ̆ng ƀok Narayana Murthy hăm anih jang kơmăy kơmŏk tơroi tơbăt, kơmăy phần mềm kơ teh đak Ấn Độ pơma hơdrô̆ păng apŭng plenh teh pơma atŭm.

Thủ tướng Phạm Minh Chính tơchĕng ‘lơ̆ng tơdrong pơma đam tôch đei yoa đơ̆ng ƀok Narayana Murthy hăm dôm công ty, bơngai juăt jang păng sinh viên Việt Nam. Kiơ̆ đơ̆ng tơdrong pơvei ‘lơ̆ng hơiă hăm Ấn Độ, Việt Nam hôn bơnê, vă pơjing tơdrong ‘lơ̆ng păng hơpơi ‘mĕh dôm grŭp jang tih kơ Ấn Độ truh tơmât jên jang xa hơdoi đunh đai tơ̆ Việt Nam lơ̆m tơdrong jang mŭk drăm kơmăy sô̆, kơmăy kơmŏk tơroi tơbăt, kơmăy phần mềm, kơmăy rơgei đơ̆ng bơngai pơm, kơmăy bán dẫn.