Tơroi ăn Yŏng khul linh tĕh đak Campuchia găh trong jang tơbôl păng khul linh tĕh đak “4 ưh” đơ̆ng Việt Nam, Thủ tướng Phạm Minh Chính pơma hơdăh, Việt Nam ling lang năng kăl păng pơ ‘nhŏ hơdrol ăn tơdrong hơnơ̆ng hơmet kơjăp păng atŏk tơiung tơdrong pơvei ‘lơ̆ng hơiă hăm tĕh đak jê̆ băl, boăl juăt đơ̆ng sơ̆, jang hơdoi tôm tơdrong, kơjăp ‘lơ̆ng đunh đai hăm Campuchia; hơnơ̆ng tơgŭm ăn 1 tĕh đak Campuchia rơngei hiôk hian, chĕp kơ̆l pơgơ̆r kơdih, jang tŏk hơnŭk hơnoa păng roi đunh roi tơgop lơ, đei anih dơ̆ng roi tih lơ̆m apŭng plenh tĕh.

Kơdră chĕp kơ̆l Khul kơdră tĕh đak Việt Nam hơpơi ‘mĕh Khul linh 2 tĕh đak athei năm hơdrol lơ̆m tơdrong vei lăng, tưk tơiung tơdrong pơvei ‘lơ̆ng hơiă Việt Nam – Campuchia. Lơ̆m nŏh đei hloi tơdrong pơtho khul bơngai jang; hơnơ̆ng hơtŏk tơdrong roi tơbăt rim tơdrong; pơtho tơƀôh tơdrong pơvei ‘lơ̆ng hơiă, mĭnh ƀơ̆r đon đơ̆ng khul linh păng kon pơlei 2 tĕh đak; sek tơlang ‘lơ̆ng dôm tơdrong tam mă lăp băl păng ‘nao đei tơ̆ tơring. Găn pơđĭ tơdrong pơm che re tĕh đak Việt Nam – Campuchia - Lào.