Sơng yă Khamphao Ernthavanh, Bơngai tang măt tôm tơdrong ăn teh đak Lào tơ̆ Việt Nam, Thủ tướng Phạm Minh Chính pơma hơdăh Việt Nam păng Lào đei tơdrong pơvei gĭt kăl, jĭ tơmam tôch kăp gĭt mă rim kon pơlei 2 teh đak athei vang vei kơjăp, hơnơ̆ng pơm hơtŏk pơ ‘lơ̆ng hlŏh dơ̆ng. Thủ tướng hơpơi ‘mĕh anih jang kơpal kơ 2 teh đak vang jang hơdoi ‘lơ̆ng hlŏh dơ̆ng, khŏm sek tơlang dôm tơdrong tơhlăk tăk vă hơnhăk tơdrong jang hơdoi găh mŭk drăm, tĕch mơdro, tơmât jên jang tŏk pran ‘lơ̆ng.

Lơ̆m kơsơ̆ ‘năr 19/3 mơ̆n, Thủ tướng Phạm Minh Chính sơng Bơngai tang măt ăn teh đak Hàn Quốc tơ̆ Việt Nam Choi Young Sam ƀlep ƀât pơtơm năm bơ̆ jang tơ̆ Việt Nam. Thủ tướng athei 2 păh hơnơ̆ng pơm hơtŏk tơdrong jang hơdoi găh tĕch mơdro, jang tŏk sơđơ̆ng ‘lơ̆ng kiơ̆ trong hơtŏ băl, kơjăp đunh; pơlung dôm anih tĕch mơdro Hàn Quốc hơnơ̆ng pơih xă tơdrong tơmât jên jang xa, lơ̆m noh năng kăl truh dôm tơdrong jang mă Hàn Quốc jang pran, rơgei găh jŏh ayŏ, jang điên tư, pơm ƀato păng dôm tơdrong jang ‘nao tŏk nhen kơchơ̆t bán dẫn.