Hmach chơt hơ iă Khul bơ̆ jang kơ IMF năm ngôi păng bơ̆ jang tơ̆ Việt Nam, Thủ tướng Phạm Minh Chính lui, ‘moi kiơ̆ rim ‘măng bơ̆ jang hăm rim hơnih bơ̆ jang, khul jang đei ƀơm truh kơ Việt Nam, Khul hlôi băt hơdăh dôm tơdrong jang mŭk drăm-tơpôl kơ Việt Nam sơnăm 2023 păng dôm khei blŭng sơnăm 2024.

Kơdră Khul Điều IV kơ IMF apĭnh athei Việt Nam kăl hơnơ̆ng pơm pơkeh trong pơkăp, pơjing tơdrong mơdro sa ‘lơ̆ng hơ iă; atŏk kơtang chĕp pơgơ̆r, tang găn sa pơgơ̆m pơjĭp; hơmet pơ ‘lơ̆ng tơdrong tơhlăk tơhlĭn hơvơn tơmơ̆t jên jang, mă kăl lơ̆m tơdrong jang ming man trong hnam, ŭnh hơyuh…

Bơnê dôm tơdrong tơgŭm djru đơ̆ng IMF ‘măn ăn Việt Nam, mă kăl ‘noh lơ̆m pơchoh trong bơ̆ jang, Thủ tướng Teh đak Phạm Minh Chính athei IMF hơnơ̆ng tơgŭm djru, hơlen hơnơ̆ng dôm tơdrong chă hơlen, tơdra hơdrol găh tơdrong hơmŏ mŭk drăm lơ̆m plei teh, đei ƀơm truh rim tơdrong jang mŭk drăm lơ̆m tơring păng pơchoh trong bơ̆ jang chĕp pơgơ̆r ăn Việt Nam; atŏk kơtang jang hơdoi, tơgŭm djru kih thuơ̆t păng pơtho pơjing lơ̆m rim tơdrong bơ̆ jang vei lăng mŭk drăm, vei lăng kon jên bơ̆ jang teh đak, trong jang jên hu, pơ̆ih să jang hơdoi, pơtho pơjing khul jang ăn Việt Nam vă pơm hơtŏk kơtang kĕ vang mơ̆t hơdoi lơ̆m apŭng plĕnh teh.