Tơ̆ jơ sơng, Thủ tướng Phạm Minh Chính lăng ‘lơ̆ng tơdrong pơvei ‘lơ̆ng hơiă đơ̆ng Việt Nam păng ƀang California pơma atŭm păng hăm pơlei tơm Oakland pơma hơdrô̆, mă loi ‘noh jĭ găh mŭk drăm mơdro sa păng jang hơdai tơnŏk đak dơ sĭ; pơma hơdăh ƀang California jĭ 1 lơ̆m dôm khŭl jang hơdai tơring tih hloh kơ Việt Nam hăm vă jê̆ 100 anih mơdro sa kơ ƀang hlôi tơmơ̆t jên jang lơ̆m Việt Nam, anih mơdro sa Việt Nam kŭm hlôi đei hloh 70 tơdrong jang tơmơ̆t jên jang lơ̆m California.

Thủ tướng Phạm Minh Chính athei Kơdră vei lăng pơlei tơm Oakland păng dôm kuan chư̆k ƀang California hơnơ̆ng bơngơ̆t truh hơtŏk tơiung tơdrong pơvei hăm Việt Nam, mă loi ‘noh jĭ găh mŭk drăm, mơdro sa, tơmơ̆t jên jang păng tơƀơ̆p pơma dơnuh kon pơlei, pơm hơnăp jang ‘noh jĭ gơng tơƀưh đơ̆ng Mi păng Việt Nam pơma atŭm kŭm nhen đơ̆ng dôm anih mơdro sa 2 teh đak pơma hơdrô̆, tơgop pơtrŭt păng hơmet ‘lơ̆ng hloh dơ̆ng tơdrong pơvei Việt Nam - Mi.