Kơsơ̆ brei 28/5, tơ̆ Anih bơ̆jang kơ Khŭl kơdră teh đak, Thủ tướng Phạm Minh Chính hlôi sơng Khŭl Nghị sĩ ƀar đảng Hạ viện Mi năm ngôi păng bơ̆jang tơ̆ Việt Nam, yua đơ̆ng Hạ Nghị sĩ John Moolenaar, bang Michigan, bơ ngai jang lơ̆m Anih Klăih song jên jang kơ Hạ viện Mi, pơm Kơdră khŭl. Tơ̆ jơ sơng, Thủ tướng Teh đak pơma hơdăh Việt Nam hơdrin trong jang tơbôl hiôk hian, pơm tơm kơdih, pơih să, lơ trong jang, lơ tơdrong pơvei; pơma hơdăh trong jang pơjing mŭk drăm hiôk hian, pơm tơm kơdih tơklep hăm kơchăng, hơdrin mơ̆t jang hơdai hăm apŭng plĕnh teh jrŭ să, tơpă păng đei yua.

Thủ tướng athei ƀok Moolenaar păng dôm Nghị sĩ Mi hơnơ̆ng bơngơ̆t truh, tơgŭm tơdrong hơtŏk tơiung đơ̆ng pơvei 2 pang, lơ̆m noh đei tơdrong set hơlen hơnhăk Việt Nam lĕch đơ̆ng hơnăn vei lăng tĕch tơlĕch tơ̆ teh đak đe gĭt kăl păng pơtrŭt tơdrong jang set hơlen drơ̆ng ăn Tơdrong tơchơ̆t mŭk drăm tĕch mơdro kơ Việt Nam. Hạ nghị sĩ Moolenaar păng dôm Nghị sĩ jang lơ̆m Khŭl pơkăp hơdrin pơtrŭt tơdrong pơvei păng jang hơdai 2 pang, lơ̆m noh đei tơdrong pơvei mŭk drăm - tĕch mơdro păng pơma đam thuê̆ đơ̆ng 2 teh đak.