Tơ̆ jơ sơng, 2 păh tŏk bŏk hơdrin tơlĕch jang tơpăt dôm tơdrong drơ̆ng nơ̆r đơ̆ng kơdră kơpal, trong tơlĕch jang hơdai đơ̆ng 2 Khŭl kơdră teh đak sơnăm 2024, dôm tơdrong tơchơ̆t atŭm, iŏk yua đơ̆ng ‘măng năm ngôi, bơ̆jang đơ̆ng kơdră kơpal 2 teh đak, lơ̆m noh pơvei pơma dơnuh khŭl rim kơdră.

Thủ tướng teh đak athei tơ̆ hơnăp kơnh, Anih jang Hơlen lăng Đảng, Dăr hơlen teh đak 2 teh đak kăl kơ jang hơdai pơjing trong tơlĕch jang kiơ̆ đei yua dôm tơdrong drơ̆ng nơ̆r kơdră kơpal, rim trong jang tơgŭm jang hơdai hlôi đei, pơtôch ‘Măng hop akŏm 46 Anih jang 2 Khŭl kơdră teh đak Việt Nam-Lào, lơ̆m noh pơtrŭt hơtŏk tơiung jang hơdai mŭk drăm ‘măng jang sơlam, pơtrŭt dôm tơdrong jang pơm tơƀưh trong nơnăm, tơgoăt mơdro sa, tơgoăt dôm anih mŭk drăm nhen tơnŏk Vũng Áng, trong gre kơdâu hrĕnh Hà Nội-Vientiane, trong gre treng Vientiane-Vũng Áng.