Bơnê kơ Ƀok kơdră Anih jang Adani năm tơmang Việt Nam păng thơ thâu hăm Adani pơtoi hơtŏk tơ-iung, Thủ tướng teh đak bơ̆n chơt hơ-iă ƀôh tơdrong jang Tơbôl tôm tơdrong kơ 2 teh đak Việt Nam - Ấn Độ tŏk bŏk oei hơtŏk tơ-iung ‘lơ̆ng lơ̆m dôm tơdrong jang, mă lei tơbôl jang mŭk drăm tam mă tơgăl hăm mŭk drăm hlôi đei. Thủ tướng Phạm Minh Chính chơt hơ-iă đei băt Anih jang Adani hlôi pơih Anih jang tang măt tơ̆ Việt Nam păng pơjing tơdrong asong jang đunh khei năr tơ̆ Việt Nam.

Thủ tướng sơkơ̆t hơdah, Việt Nam gô tơgŭm, pơm trong hiôk ăn anih jang mŭk drăm, lơ̆m noh đei anih jang mŭk drăm kơ teh đak Ấn Độ pơma atŭm păng Adani pơma hơdrô̆ tơlĕch pơm jang tĕch pơdro đei jơnei păng kơjăp tơ̆ Việt Nam, tơgop kăp gĭt lơ̆m hơtŏk tơbôl Jang hadoi tôm tơdrong kơ 2 teh đak roi năr roi hơtŏk tơ-iung.