Tơ̆ jơ sơng, Thủ tướng Phạm Minh Chính pơma hơdăh, Việt Nam ling lang lăng Nhật Bản ‘noh jĭ teh đak jang hơdai lui ngeh, gĭt kăl hloh păng đunh đai. 2 păh tơbăt tơdrong pơvei jang hơdai gĭt kăl jrŭ să Việt Nam - Nhật Bản tŏk bŏk lơ̆m jăl jang hơtŏk tơiung ‘lơ̆ng hơiă, pran kơtang păng ‘lơ̆ng tơ pă lơ̆m lơ tơdrong jang.

Thủ tướng Phạm Minh Chính athei 2 păh hơnơ̆ng hơmet ming tơdrong lui ngeh chĭnh trĭ ‘moi kiơ̆ dôm ‘măng năm ngôi, tơƀơ̆p tơ̆ kơdră kơpal kŭm nhen dôm kơdră tơm, anih jang, hơtŏk loi dơ̆ng tơgoăt, jang hơdai đơ̆ng tơring, anih mơdro sa; pơtrŭt tơƀơ̆p pơma dơnuh đơ̆ng kon pơlei, lơ̆m noh Nhật Bản set hơlen pơm ƀônh hla ar asong visa, yak truh asong đĕch visa ăn bơngai Việt Nam năm tơ̆ Nhật Bản vă pơtrŭt jang hơdai tơmang lăng, tơƀơ̆p pơma dơnuh kon pơlei; pơm tơdrong hiôk ăn tơpôl vă jê̆ 500 rơbâu ‘nu Việt Nam tơ̆ Nhật Bản arih sa, hŏk pơhrăm păng bơ̆jang.