Thủ tướng Phạm Minh Chính hôn bơnê Kơdră chĕp kơ̆l ƀang Hạ Saxony ‘măng mă blŭng năm hơpong tơ̆ Việt Nam kŭm hăm khul tĕch mơdro ƀât mă tơdrong pơvei jang hơdoi gĭt kăl Việt Nam – Đức oei tŏk tôch ‘lơ̆ng. Thủ tướng Phạm Minh Chính athei 2 păh hơtŏk tơdrong jang hơdoi găh chinh trĭ – jang tơbôl, tĕch mơdro – tơmât jên jang, tơjră hăm tŏ ‘mi kial tơplih, pơtho tơdrong jang, chă tơmang lăng, pơvei kon pơlei, vă hơnhăk dơ̆ng tơdrong đei yoa ăn rim tĕh đak, hơtŏk đon hlôh vao băl đơ̆ng kon pơlei 2 tĕh đak păng tơgop ăn tơdrong rơngei, jang hơdoi păng jang tŏk tơ̆ tơring păng lơ̆m apŭng plenh tĕh.

Hăm jơhngâm đon tơpăt ‘lơ̆ng, chơt rơhău păng lui băl, Thủ tướng Phạm Minh Chính athei Khul kơdră pơgơ̆r ƀang Hạ Saxony pơlung anih tĕch mơdro đơ̆ng ƀang truh tơmât jên jang tơ̆ Việt Nam lơ̆m dôm tơdrong pran ‘lơ̆ng păng lăp hăm tơdrong ‘mĕh vă đơ̆ng 2 păh nhen jang kơmăy kơmŏk ‘nao, tơplih hăm kơmăy sô̆, jang tŏk rơgŏh ‘lơ̆ng, tang găn tŏ ‘mi kial tơplih...