Tơ̆ jơ bơ̆jang, Thủ tướng hlôi mơ̆ng kơdră Grŭp jang Adani roi tơƀôh găh Grŭp jang păng pơma dơnuh găh dôm tơdrong jang tơmơ̆t jên jang đơ̆ng Adani tơ̆ Việt Nam păng tơmam ‘lơ̆ng, tơdrong hiôk jang hơdai tơ̆ hơnăp kơnh mă loi ‘noh jĭ tơdrong jang pơm tơnŏk Liên Chiểu Đà Nẵng, Cham gre păr Chu Lai, Hnam kơmăy ŭnh điên Vĩnh Tân 3... Adani ‘meh vă păih Việt Nam pơm tơdrong hiôk, hơmet pơ ‘lơ̆ng dôm tơdrong mơmat tat găh hla ar trŏ luơ̆t dôm tơdrong vă jang ‘nâu. Pơma tơ̆ âu, Thủ tướng Phạm Minh Chính hôn bơnê jơnei tơdrong jang tĕch mơdro păng trĕng lăng đơ̆ng Grŭp jang Adani lơ̆m khei ‘năr âu ki.

Lăng ‘lơ̆ng tơdrong jang hơdai, tơmơ̆t jên jang đơ̆ng Grŭp jang tơ̆ Việt Nam păng ‘meh vă hơtŏk tơiung, pơih să tơ̆ hơnăp kơnh. Thủ tướng pơma hơdăh, Việt Nam hôn bơnê grŭp jang tơmơ̆t jên jang lơ̆m dôm tơdrong jang Việt Nam tơgŭm hơdrol, ‘noh jĭ tơdrong jang ŭnh hơyuh, trong nơnăm, logictic. Thủ tướng athei kơdră chĕp kơ̆l Grŭp jang hlôi pơma dơnuh ‘noh athei jang păng athei pơma dơnuh mă hơdăh tơdrong jang vă rơdăh bơngai, rơđăh tơdrong, rơđăh tơmam, rơđăh hơnăp jang păng hlôi pơkăp ‘noh athei bơ̆jang kiơ̆, vă pơtrŭt dôm tơdrong vă jang.