Kơtơ̆ng ang Kơdră Kuôk hô̆i Bulgaria gah dôm tơdrong kăl vă tơ-iung pơjing teh đak, trong tơchơ̆t jang tơbôl, tơchơ̆t jang vei sơđơ̆ng tơpôl teh đak, adoi nhen tơdrong jang đei jơnei hơtŏk mŭk drăm – tơpôl kơ Việt Nam, Thủ tướng teh đak bơ̆n  Phạm Minh Chính akhan, 2 pah kăl hơtŏk jang hadoi păng hơpơi ‘meh roi năr roi đei lơ hloh anih jang mŭk drăm, anih asong jang kơ Việt Nam păng Bulgaria asong jang hăm rim pah.

Thủ tướng Phạm Minh Chính pơkăl 2 pah sơkơ̆t hơdah jang hadoi mŭk drăm jing tơdrong jang tơm lơ̆m tơbôl kơ 2 teh đak, kăl hơtŏk jang tơbôl tĕch pơdro 2 pah vă hrôih đei iŏk 500 trĭu đôlar 1 sơnăm. Ƀơ̆t ‘măng âu, Thủ tướng Phạm Minh Chính bơnê kơ teh đak Bulgaria hlôi tơgŭm pơtho kơ rơbăn kan ƀô̆, sinh viên, bơngai hŏk hơlen Việt Nam, lơ̆m noh đei lơ kơdră kơpal kơ Việt Nam; pơkăl 2 pah hơlen dôm tơdrong hiôk jang hadoi pơtho pơhrăm ‘nao vă hơvơn đe sinh viên, hŏk hơlen kơ  2 teh đak kiơ̆ hŏk tơ̆ dôm hnam trưng, anih pơtho pơhrăm kơ rim teh đak lơ̆m dôm tơdrong jang mă 2 pah jang pran.