Tơ̆ jơ sơng, Thủ tướng Phạm Minh Chính chơt hơ-iă ƀôh tơdrong jang tơbôl kơ 2 teh đak đei hơtŏk 'lơ̆ng. Teh đak Bỉ hơnơ̆ng oei lơ̆m grŭp teh đak jang tĕch pơdro dơnơm kơ Việt Nam lơ̆m EU, păng Việt Nam jing teh đak jang tĕch pơdro pran hloh kơ teh đak Bỉ lơ̆m ASEAN; jang hadoi kơ 2 Kuôk hô̆i Việt Nam păng Ngĭ viê̆n Bỉ đei hơtŏk 'nao.

Khei năr truh, Thủ tướng pơkăl 2 păh pơtoi asong khul kơpal năm tơmang dih băl; hơtŏk jang hadoi gah mŭk drăm, tĕch pơdro, asong jang, hơdrin jang tĕch pơdro kơ 2 pah dah hrôih đei yua 7 tih USD lơ̆m minh ƀar sơnăm truh. Kơdră Thươ̆ng viê̆n Bỉ sơkơ̆t hơdah, Thươ̆ng viê̆n Bỉ gô hơtŏk hloh jang tơbôl Việt Nam – Bỉ hăm lơ tơdrong jang hơdah, lơ̆m noh đei tơdrong jang mă Thủ tướng hlôi tơroi, mă kăl noh gah tơplih 'nao gơh hơgei, hơtŏk tĕch pơdro, tơroh asong jang lơ trong păng tơgŭm bơngai ƀơm răm dioxin Việt Nam.