Thủ tướng Phạm Minh Chính chơt hơiă sơng ƀok Kơdră tơm tĕh đak Mông Cổ Khurelsukh, akhan ‘măng năm hơpong âu tôch gĭt kăl, đei adrol kơ tơdrong tơbăt 70 sơnăm pơjing tơdrong pơvei jang tơbôl lơ̆m sơnăm 2024 păng hơnhăk tơdrong pơvei ‘lơ̆ng hơiă đơ̆ng sơ̆ kơ 2 pang mât lơ̆m chăl jang tŏk ‘nao, lăp hăm yăn âu păng đei yoa.

Ƀar păh hlôi pơma nuh găh dôm trong jang tôch hơdăh vă hơtŏk tơdrong jang hơdoi đei yoa ‘lơ̆ng hlŏh dơ̆ng lơ̆m rim tơdrong, lăp hăm tơdrong pran ‘lơ̆ng păng tơdrong ‘mĕh vă đơ̆ng 2 păh, tơgăl hăm tơdrong pơvei chinh trĭ ‘lơ̆ng hơiă đơ̆ng 2 tĕh đak. Thủ tướng hôn bơnê 2 păh hlôi pơih trong gre păr, păr tơpăt tơ̆ băl păng kĭ tơdrong Tơchơ̆t ưh kăl pơm hla ar mât lĕch hăm dôm bơngai đei tôm hla ar hô̆ chĭu, kiơ̆ đơ̆ng noh pơjing tơdrong ‘lơ̆ng, hiôk hian vă hơtŏk tơdrong jang hơdoi găh tơmang lăng, tĕch mơdro păng hơtŏk tơdrong pơvei ăn kon pơlei 2 tĕh đak.