Tơ̆ jơ tơƀâp, 2 păh drơ̆ng nơ̆r hơnơ̆ng hơtŏk tơdrong ăn khul jang tih kơ teh đak păng dôm tơring, anih jang kơpal chă pơma nuh hăm băl; pơma hơdăh tơdrong tơƀâp băl hơnơ̆ng đơ̆ng dôm kơdră chĕp kơ̆l 2 teh đak vang tơgop hơmet kơjăp, pơm hơtŏk đon lui chinh trĭ păng tưk tơiung tơdrong jang hơdoi 2 pang tôm tơdrong.

Kơdră tơm Marcos Jr. drơ̆ng nơ̆r hăm nơ̆r pơam athei đơ̆ng Thủ tướng Phạm Minh Chính găh hơtŏk tơdrong jang hơdoi găh dôm tơdrong oei đei lơ tơdrong ‘lơ̆ng nhen pơtho pơhrăm, jang khoa hŏk kơmăy kơmŏk, chă tơmang lăng, jŏh ayŏ kơ dŏ xoang, pơvei kon pơlei, jang hơdoi 2 pang. Pơma nuh găh dôm tơdrong lơ̆m apŭng plenh tĕh păng tơ̆ tơring, 2 ‘nu Kơdră chĕp kơ̆l tơchĕng ‘lơ̆ng tơdrong 2 teh đak hơnơ̆ng jang hơdoi kơjăp ‘lơ̆ng tơ̆ dôm khul grŭp lơ̆m tơring păng lơ̆m apŭng plenh teh nhen ASEAN, Liên hợp quốc, APEC, ASEM; pơma truh tơdrong kăl vei kơjăp tơdrong mât 1 ƀơ̆r đon păng hơnăp jang tơm đơ̆ng ASEAN, pôm jơhngâm pơjing mĭnh Tơpôl ASEAN pran kơjăp, tơguăt băl păng jang tŏk kơdih.