Thủ tướng pơma hơdăh Việt Nam ling lang jang hơdai, đĭ jơhngơ̆m tơgŭm Lào kiơ̆ kĕ jang vă vang dai băl yak hloh mơmat tat, hơnơ̆ng hơtŏk tơiung. Lơ̆m tơdrong jang pơgang, ƀôh hơdăh ‘noh jĭ dôm tơdrong jang hơdai lơ̆m tơdrong jang khăm hơmet jĭ, pơtho pơhrăm bơngai jang pơgang, vei lăng jĭ jăn păng tơgŭm hơtŏk loi dơ̆ng vei lăng tơdrong jang pơgang; lơ̆m khei ‘năr jĭ COVID-19, dôm tơdrong jang tơgŭm vaccine, tơmam, kơmăy kơmŏk pơgang, vang tơ roi băl tơdrong hlôh vao păng ăn bơngai joăt jang hlôi tơgop tơgŭm 2 teh đak ƀrư̆ ƀrư̆ vei lăng păng yak hloh jĭ hơbuh.

Tơ̆ hơnăp kơnh, Thủ tướng athei 2 Anih tơm vei lăng jang pơgang jang hơdai pơjing trong tơlĕch jang vă pơm hơdăh ‘lơ̆ng, tơlĕch jang kiơ̆ đei yua dôm tơdrong drơ̆ng nơ̆r gĭt kăl đơ̆ng 2 teh đak; hơnơ̆ng pơma dơnuh tơroi băl tơdrong hlôh vao, mă loi ‘noh jĭ lơ̆m tŭn pran tơplih kơ sô̆, khăm hơmet jĭ đơ̆ng hơtăih....; tơgŭm, pơm tơdrong hiôk lơ̆m tơdrong khăm hơmet jĭ ăn kon pơlei đơ̆ng Lào tơ̆ dôm hnam pơgang kơ Việt Nam; hơtŏk loi dơ̆ng tơdrong jang pơtho pơhrăm bơngai jang lơ̆m tơdrong jang pơgang, pơih să dơ̆ng dôm anih jang pơtho pơhrăm lăp hăm ‘meh vă hrei ‘nâu kơ teh đak Lào.