Thủ tướng hôn bơnê dôm tơdrong jang hơdoi, dôm nơ̆r pơma ‘lơ̆ng, lăp đơ̆ng Anih tơm vei lăng jên hu tĕh đak Mi găh trong pơgơ̆r bơ̆ jang, vei lăng jên hu, kơjă jên đơ̆ng Việt Nam. Kiơ̆ jơhngâm đon tơpăt ‘lơ̆ng, lui băl, rơhău chơt, Thủ tướng athei 2 păh hơnơ̆ng ăn khul năm hơpong, pơma nuh hăm băl, hơtŏk tơdrong jang hơdoi mŭk drăm đơ̆ng 2 păh, tưk tơiung tơdrong jang hơdoi, tĕch mơdro, tơmât jên jang, lơ̆m nŏh đei jang tŏk rơgŏh, tơplih ‘nao rơgei, jang hăm kơmăy kơmŏk ‘nao, pơtruh tơmam drăm… Atŭm hăm ‘nŏh, hơtŏk tơdrong jang hơdoi găh tơjră hăm tŏ ‘mi kial tơplih, bơ̆ jang kiơ̆ Tơdrong tơchơ̆t jang hơdoi pơtruh unh hơyuh hơtŏ băl, tơgŭm ăn Việt Nam atŏk tơiung anih jang kơmăy unh hơyuh rơgŏh.

Kơdră tơm vei lăng jên hu tĕh đak Mi pơma hơdăh Việt Nam jĭ tĕh đak jang hơdoi roi đunh roi gĭt kăl hăm tĕh đak Mi păng iŏk hơnăp jang tơm lơ̆m trong jang Ấn Độ Dương – Thái Bình Dương đơ̆ng tĕh đak ‘nâu. Mi hơpơi ‘mĕh hơtŏk tơdrong jang hơdoi mŭk drăm, tĕch mơdro hăm Việt Nam; đei trong hơtŏk tơdrong jang hơdoi hăm Việt Nam găh pơtruh tơmam kiơ̆ đơ̆ng jang hơdoi tôm tơdrong, lui băl; tơgŭm ăn Việt Nam hơtŏk kơsư̆k pơm tơlĕch chip bán dẫn păng unh hơyuh rơgŏh.