Thủ tướng Phạm Minh Chính pơma hơdăh Việt Nam ưh đei tơplih đon jang tơbôl đơ̆ng kơdih, kơchăng, jang kiơ̆ lơ trong, lơ pang, jĭ boăl juăt, jĭ teh đak jang hơdoi tôch sơđơ̆ng, jĭ teh đak vang jang tôch tơnăp lơ̆m tơpôl apŭng plenh teh yoa tơdrong rơngei, jang hơdoi, jang tŏk tơ̆ tơring păng lơ̆m apŭng plenh teh; năng kăl păng hơpơi ‘mĕh kŭm hăm Nhật Bản tơlĕch jang đei yoa ‘lơ̆ng tơdrong Pơvei, jang hơdoi gĭt kăl tôm tơdrong yoa tơdrong rơngei păng hơnŭk hơnoa tơ̆ châu Á păng lơ̆m apŭng plenh teh.

Tơ̆ jơ sơng, 2 păh pơma nuh găh tơdrong lơ̆m apŭng plenh teh păng tơ̆ tơring. 2 păh pơma hơdăh tơdrong gĭt kăl đơ̆ng vei lăng sơđơ̆ng, hiôk hian ăn trong gre păr, trong đak tơ̆ đak dơsĭ Biển Đông, sek tơlang rim tơdrong tơgar băl kiơ̆ trong rơngei ‘moi kiơ̆ khôi luơ̆t apŭng plenh teh, mă loi jĭ Tơdrong tơchơ̆t Liên Hợp Quốc păng Hla ar pơkăp đơ̆ng Liên Hợp Quốc găh Luơ̆t Đak dơsĭ (UNCLOS) sơnăm 1982.